మద్యానికే మహారాజ పోషణ

మద్యం అమ్మకాలను ఆదాయ వనరుగా చూడం. బెల్టు షాపులు రద్దు చేస్తాం. దశలవారీగా మద్య నిషేధాన్ని అమలు చేస్తాం. అని రాజశేఖర్ రెడ్డి పార్టీ 2004 లో తన ఎన్నికల ప్రణాళికలో చేసిన వాగ్దానమిది. ఈ ఐదేళ్ళలో రాష్ట్రంలో ఈ పార్టీ అందుకు పూర్తిగా భిన్నంగా ప్రవర్తించిది. మద్యం అమ్మకాలద్వారా ఏటా రు.12000కోట్ల ఆదాయం వస్తుంది.

పలు ఆర్ధిక, సామాజిక రుగ్మతలకు మూలకారణం మద్యమే. దీని వల్ల బాలకార్మిక వ్యవస్థ విస్తరిస్తుంది. మద్యానికి బానిసలై భర్త మరణించగా , బిడ్డల పోషణ భారంతో కుంగిపోతున్న మూడు పదులలోపు వయసు గల మహిళలు ఒక్క మెదక్ జిల్లాలోనే 16000 మంది ఉన్నారు. నేరాలూ ఘోరాలూ, హత్యలూ, అత్యాచారాలూ, ప్రకోపాలూ, ప్రమాదాలూ జరగడానికి మద్యమే ప్రధాన కారణం. వైన్ షాపుల వద్దే బహిరంగ మద్య సేవనం జరుగుతున్నా ఎవరూ పట్టించుకోవడంలేదు. రెండు రూపాయలు మాత్రమే విలువచేసే చీపు లిక్కరు సీసాను రు.50 వరకూ అమ్ముతూ పేదప్రజల కష్టార్జితాన్ని రాజశేఖరరెడ్డి ప్రభుత్వం దోచుకుంటుంది. కల్తీకల్లు మాఫియా రూపేణా మరో కాలనాగు బడుగుల జీవితాల్లో విషం చిమ్ముతుంది. మద్యం అమ్మకాలు మరింత జోరుగా సాగించి మద్యం అమ్మకాలు పెంచాలని ముఖ్యమంత్రి వైయ్యస్ రాజశేఖరరెడ్డి ఎక్సైజు శాఖ అధికారులకు హుకుం జారీ చేశాడు. అభివృద్ధే తమ ఎజండా అని ఢంకా బజాయిస్తున్న రాజశేఖర్ రెడ్డి మద్యం అమ్మకాల్లో దాన్ని సాకారం చేశారు. మాటమీదకాదూ మద్యం మీద నిలబడతానని నిరూపించుకున్నాడు. ఎన్నికల సమయంలో కోట్లరూపాయల అక్రమమద్యం పట్టుబడింది. ధనం ,ద్రవం ఎన్నికల ఫలితాలను శాసించినంతకాలం ప్రజాస్వామ్యం తప్పటడుగులు వేయకతప్పదు.

"నస్త్రీ స్వాతంత్ర్యమర్హతి " అన్న విలువకు బొంద పెట్టాలి

మతం మనుషుల మెదళ్ళపై పెత్తనం చేస్తున్నది. ప్రతి మతం స్త్రీని పురుషుడికి సంబంధించిన ఒక వస్తువుగా చిత్రీకరించింది. వీటి ప్రకారం స్త్రీ పిల్లల్ని కనే ఓ యంత్రం. పురుషుడి ఆస్తికి వారసుడిని కనలేకపోతే విసర్జించాల్సిన యంత్రం. ఒక క్రమంలో రాజుల, జమీందారుల, భూస్వాముల భోగవస్తువు. నేటి వ్యాపార సమాజంలో స్త్రీ వర్తకపు సరుకు. పురుషుడి విసృంఖల కామానికి బలి పశువుగా మారింది.

కొన్ని సంవత్సరాల క్రితం క్రింది వర్గాల స్త్రీలపై పెత్తందారుల దౌస్ట్యాల గురించి వింటూ వుండేవారం. నేడది సర్వ వ్యాపితమైంది. పూరి గుడిసెల్లోకి కూడా చొరబడిన టి.వి.లు యువకుల్లో నీచ కామాన్ని రెచ్చగొడుతున్నాయి. ప్రేమ స్థానాన్ని కోరిక ఆక్రమించింది. దానికి తరతరాలుగా పాతుకుపోయిన పురుషాధిపత్యం సంస్కృతి " మంటకు పడమటి గాలిలా " తోడైంది. నాలుగు గోడల వెలుపల జరిగే సంఘటనలే మానవ విలువలను వణికిస్తున్నాయి. నాలుగు గోడల నడుమ అనునిత్యం కోట్లాదిమంది స్త్రీలు అనుభవిస్తున్న నరకయాతనలు మొత్తంగా వెలుగుచూస్తే పురుష వ్యతిరేక స్త్రీ టెర్రరిష్టు గ్రూపులెందుకు ఏర్పడడంలేదా అని ఆశ్ఛర్యం కలుగకమానదు. మానవజాతి పునరుత్పత్తి భారాన్నంతటినీ ఏమనిషి మోస్తున్నదో , ఆస్త్రీపై చిత్తకార్తె కుక్కల్లా అన్ని కార్తెల్లో ఎగబడుతున్న పురుష కామాంధతకు వ్యతిరేకంగా ఒక మహూద్యమం సాగాల్సివుంది. అందుకోసం ముందుగా ప్రగతిశీల మహిళా సంఘాలు, హక్కుల సంఘాలు, తక్షణ, దీర్ఘకాలిక , సమష్టి కార్యక్రమాన్ని రూపొందించుకోవాలి.